Umuyobozi wa Paris yashimye ubutwari bw’Abanyarwanda nyuma ya Jenoside yakorewe Abatutsi

Kuri uyu wa Kabiri, Umuyobozi w’Umujyi wa Paris mu Bufaransa, Anne Hidalgo yasuye urwibutso rwa Jenoside rwa Kigali ruri ku Gisozi, ashima ubutwari abanyarwanda bagaragaje bakabasha kongera kubaka igihugu nyuma yo gusenywa na Jenoside yakorewe Abatutsi mu 1994.

Hidalgo yabyanditse mu gitabo cy'abashyitsi nyuma yo gusura urwibutso rwa jenoside rwa Kigali ku Gisozi.

Ku rwibutso rwa jenoside rwa Kigali, Hidalgo yasuye ibice bitandukanye bigize urwibutso asobanurirwa amateka y'u Rwanda mbere ya Jenoside yakorewe Abatutsi, mu gihe yakorwaga ndetse na Nyuma yayo.

Uyu muyobozi yunamiye abarenga ibihumbi 250 baruhukiye muri uru rwibutso, akaba ari bunasure urwibutso rwa Jenoside rwa Nyanza ya Kicukiro.

Yavuze ko  amateka, ukuri no kwibuka ari ingenzi cyane mu kubaka amahoro ndetse n'isi.

Uyu muyobozi ari mu Rwanda aho yitabiriye inama kimwe n’abandi bayobozi bari mu ihuriro ry’imijyi ikoresha ururimi rw’Igifaransa.