Umugaba Mukuru w’Ingabo za Sénégal yatangiye uruzinduko rw’akazi mu Rwanda

Kuri uyu wa Mbere, Umugaba Mukuru w'Ingabo z'u Rwanda, Gen Mubarakh Muganga, yakiriye mugenzi we wa Sénégal, Gen Mbaye Cissé n’itsinda ayoboye mbere yo kuganira na Minisitiri w'Ingabo, Juvenal Marizamunda.

Uyu muyobozi yaganirijwe ku rugendo rwa RDF n’uburyo yiyubatse, anagaragarizwa ibibazo biri muri aka Karere. 

Nyuma y’ibi biganiro, Gen Mbaye yabwiye itangazamakuru ko uru rugendo ruri muri gahunda z’umubano mwiza n’ubufatanye bisanzweho hagati y’u Rwanda na Senegal.

Yagaragaje amateka ari hagati ya RDF n’igisirikare cya Senegali, avuga ko ingabo z’Igihugu cye zagiye zunguka ubunararibonye mu kubungabunga amahoro ku Isi, harimo ko ngabo zabo zagize uruhare mu gushaka uko Jenoside yakorerwaga Abatutsi yahagarikwa.

Yagize ati “Mu gihe kiri imbere ubufatanye n’ingabo z’u Rwanda buzibanda mu mahugurwa, ubu turi mu ntangiriro zo gushaka uko hakorwa amahugurwa mu bijyanye n’ibikorwa byo kubungabunga amahoro.”

Gen Mbaye kandi yasuye Urwibutso rwa Jenoside yakorewe Abatutsi rwa Kigali ku Gisozi, yunamira abahashyinguwe mu cyubahiro, nyuma anasura Ingoro y'Amateka y'Urugamba rwo Guhagarika Jenoside.