Gatabazi yasabye abarebwa no gufata dose ya kabiri y’urukingo rwa Covid-19 kwihutira kurufata

Minisitiri w'Ubutegetsi bw'Igihugu, Gatabazi Jean Marie Vianney yasabye Abanyarwanda barebwa no gufata dose ya kabiri y’urukingo rwa covid-19 kwihutira kurufata, kuko guhera kuri uyu wa Kabiri mu Mujyi wa Kigali ibikorwa byo gukingira byakomeje.

Hirya no hino mu Mujyi wa Kigali hatangiye ibikorwa byo gukingira Covid19 hatangwa urukingo rwa 2 ku bagejeje igihe cyarwo, urukingo ruratangirwa ahantu hatandukanye harimo ibigo nderabuzima, kuri za sitade n’ahandi hasanzwe hatangirwa inkingo mu mujyi wa Kigali.

Ababyitabiriye biganjemo urubyiruko kuko n’ubundi harimo gukingirwa abafite kuva ku myaka 18, bakaba basaba bagenzi babo bahawe dose ya mbere kuza gufata iya kabiri.

Minisitiri Gatabazi avuga ko hashyizweho ahantu henshi ho gukingirira mu mujyi wa Kigali, ndetse n’umubare w’abakozi urongerwa hagamijwe ko abikingiza dose ya kabiri bose bagerwaho kandi hatabayeho gutonda umurongo igihe kirerekire. Gusa anasaba abaturage bamaze gukingirwa kutadohoka ku ngamba zisanzweho zo kwirinda Covid19.

Asaba kandi inzego z’ibanze kwitegura gahunda yo gukingira mu buryo bwa rusange abantu benshi mu ntara iteganyijwe mu minsi ya vuba.

Abaturage kandi barasabwa kwirinda amakosa yagiye agaragara aho bakingirira, kuko ngo hari abagiye bakingirwa batujuje impapuro zabigenewe.

Hari hashize iminsi 21 mu Mujyi wa kigali hatangiye ibikorwa byo gukingira abantu bose bafite hejuru y'imyaka 18, benshi muri aba akaba ari bo ubu barimo guhabwa dose ya Kabiri.

Fiston Felix Habineza