Bamwe mu batuye muri Kigali baravuga ko bahangayikishijwe n’ubwiyongere bw’abiyita abavuzi gakondo

Bamwe mu batuye mu Mujyi wa Kigali, baravuga ko bahangayikishijwe n’ubwiyongere bw’abiyita abavuzi gakondo bavuga ko bavura indwara zose nyamara bagamije gusa kwishakira amafaranga.

Bamwe mu bavuzi gakondo, nabo bemeza ko hari abivanze mu mwuga wabo nyamara atari abavuzi.

Aba baturage bavuga ko ibi bita ubushukanyi bwambura bukorwa n’abantu bagenda bamamaza imiti mu mihanda n’ahahurira abantu benshi, ndetse bamwe bakanifashisha ibitangazamakuru babahamagarira kwivuza cyangwa gufata imiti yabo. 

Aba baturage bifuza ko inzego zibishinzwe zahagurukira iki kibazo, ibi bikorwa bigahagarara.

Uwitwa Mporanzi Theogene yagize ati "Indwara yose bavuga ko bayishobora kubera ko bashaka ifaranga, baravuga bati dufite umuti wongera igitsina, ukagenda ukabyisiga ariko ntihagire impinduka bikora."

Micomyiza Olivier we ati "Aba bantu bamamaza ku maradiyo ushobora gusanga banabeshya, baca amafaranga menshi kandi ari n’indwara ivurirwa kwa muganga, bakaguhereza imiti ikaba yanaguhitana kandi baguciye n’amafaranga menshi."

Bamwe mu bavuzi gakondo na bo bemeza ko hari abamamyi bivanze mu mwuga wabo, bagakora ibinyuranije n’amategeko.

Nzayisenga Modeste uzwi nka Rutangarwamaboko ati ‘’Ubuzima bw’umuntu ntabwo ari ubwo gukiniraho, ese ni iki kivuga ko uwo muntu wamamaza ko ari umuvuzi koko ko ariwe? ibyo ni ukubyitondera, niba ukora ibyo bintu abantu barabizi bazakugana, kuki ugombera kujya kuvuga ibivugwa n’ibitavugwa, nibo bagukeneye, niyo mpamvu nakubwiye ngo ubuvuzi butandukanye n’ibindi bicuruzwa nta n’ubwo babyita ubucuruzi.’’

Umuyobozi w’ishami rishinzwe gukurikirana ingaruka z’ibiribwa n’imiti mu kigo cy’igihugu gishinzwe ubuziranenge bw’ibiribwa n’imiti FDA,  Ntirenganya Lazare avuga ko uretse abagenda bamamaza ubuvuzi n’imiti gakondo mu mihanda n’ahahurira abantu benshi, hari n’abavuzi gakondo bafite aho bakorera hazwi ariko bakarenga ku mabwiriza ajyanye n’ubunyamwuga .

FDA ivuga ko guhera m'Ukwakira 2021 kugeza ubu, kimaze kwihanangiriza mu magambo no mu nyandiko amavuriro gakondo 24 yagaragaweho kurenga ku mabwiriza agenga ubuvuzi gakondo, kikavuga ko nibatikosora hazakurikiraho ibihano.

Jean Paul Maniraho