Abatuye i Nyamirambo barasabwa kubyaza umusaruro ibikorwa remezo bimaze kuhubakwa

Abatuye mu gace ka Nyamirambo ahazwi nko mu biryogo barasabwa kubyaza umusaruro ibikorwa remezo birimo imihanda bimaze guhindura isura yaka gace.

Ntivuguruzwa Ramazani amaze imyaka irenga 40 atuye  mu kagali ka Biryogo, akaba avuga ko yatunguwe no kuba umunsi umwe yaratashye, agasanga imodoka zatangiye gukora umuhanda w’imoka imbere yiwe.

Ni ibintu ahuriyeho n' abandi baturage batuye muri aka gace, ubu kahinduye isura ku buryo bugaragara.

Muhirwa Marie Solange, umuyobozi w'Umujyi wa Kigali ushinzwe igenamigambi, avuga ko kugeza ubu ibikorwa byo kuvugurura aka gace gashyirwamo ibikorwa remezo bigeze ku kigero cya 77 %.

Asaba abaturage kubyaza umusaruro ibi bikorwa remezo bari kwegerezwa.

 Ubuyobozi bw'Umujyi wa Kigali buvuga ko umushinga wo kuvugurura aka gace ufite ingengo y' imari ya miliyoni 10 z'amadorali ya Amerika, hakaba harimo kubaka imihanda, gushyira amatara ku mihanda, kubaka ruhururura ndetse no kubaka utuyira tw'abanyamaguru harimo no kubaka ibyanya abana bakiniramo.

Umujyi wa Kigali kandi uvuga ko umwaka utaha gutunganya imihanda mito yo muri karitsiye bizagera mu duce twa Kimisagara mu Gatenga n’ahandi.

Fiston Felix Habineza