Ntewe impungenge n'abakomeje kwibona mu ndorerwamo z’amoko-Pasiteri Rutayisire

Mnisiteri y’Ubuhinzi n’Ubworozi iravuga ko n’ubwo urwego rw’ubuhinzi rwahuye n’ibibazo byo gutakaza abantu benshi mu gihe cya Jenoside yakorewe Abatutsi, uru rwego ruzakomeza kuba ku isonga mu gufasha Abanyarwanda mu kugira imibereho myiza no kwiteza imbere.

Byagarutsweho kuri uyu wa Gatandatu i Huye ubwo hibukwaga abakoreraga ibigo byahurijwe mu kigo RAB bishwe muri Jenoside yakorewe Abatutsi.

Pasiteri Antoine Rutayisire ufite umuvandimwe wakoreraga kimwe muri ibi bigo akaza kuhicirwa muri Jenoside yakorewe Abatutsi, mu gusobanura akaga u Rwanda rwanyuzemo yavuze ko atewe impungenge na bamwe bakibona mu ndorerwamo z’amoko nyamara yaroretse igihugu.

Aha i Rubona mu gihe cya jenoside, uretse abari abakozi b’ibigo by’ubuhinzi n’ubworozi  bahiciwe hari n’abaturage bahahungiye bizeye kuharokokera baza kuhicirwa. 

Minisitiri w’Ubuhinzi n’Ubworozi, Dr Musafiri Ildephonse avuga ko ubuhinzi buzarushaho kuba inkingi y’iterambere ry’Abanyarwanda ntawe usigaye.

Abari abakozi b’ibigo byaje guhindurwa RAB bibutswe uyu munsi ni 228 barimo 205 bakoreraga Ikigo cy’Ubushakashatsi mu Buhinzi n’Ubworozi, 11 bakoreraga serivisi y'imbuto z'indobanure 10 bakoreraga Laboratwari y'Ubuvuzi bw'Amatungo, na babiri bakoreraga Ikigo cyari gishinzwe gutera intanga mu matungo, kuri ubu bose bakaba baruhukiye ku rwibutso rwa jenoside rwa Rubona.

Tuyisenge Adolphe