Ruhango: Barifuza imbuto nshya y’imyumbati

Hari abahinzi b’imyumbati mu murenge wa Mbuye mu Karere ka Ruhango bavuga ko bakeneye imbuto nziza kuko iyo basanganwe nta musaruro irimo kubaha. Ikigo RAB kirabashisikariza gutera imbuto zizewe kuko ari zo zitarwara kandi zigahangana n’ibihe bibi.

Urebye ingano y’iyi myumbati ukagereranya n’ikunze kwerekanwa mu mamurika ntiwakeka ko yasaruwe mu Ruhango akarere kamaze kwandika izina mu buhinzi bw’imyumbati. Usibye imihindagurikire y’ikirere indwara yibasiye iyi mbuto bahinga no yo iri imbere mu gutubya uyu musaruro. Ni ikibazo gihangayikishije abahinzi ku kigero cyo hejuru hashingiwe ku mwanya imyumbati ifite m bukungu bw’aka gace.

Bavuga ko cyakemurwa no guhindura imbuto. Ubu ngo batangiye kwiyandikisha ariko bafite impungenge ko batazabona imbuto ihagije.

Kayumba John umuyobozi w’ikigo RAB ku ishami rya Muhanga avuga ko kugeza ubu nta kibazo gikabije kiri mu buhinzi bw’imyumbati haba ku mbuto n’umusaruro. N’ubwo habayeho imihindagurikire y’ikirere avuga ko imyubati itagezweho cyane akaba asanga abahinzi bakwiye gutora umuco wo gutera imbuto yizewe.

RAB ishami rya Muhanga itangaza ko impuzandengo y’umusaruro w’imyumbati kuri hegitari iri kuri toni 26 mu gihe hari abahinzi bamaze gutera intambwe ifatika bashobora kugeza kuri 60. Aba ni nabo bakuza kuzana imyumbati mu mamurika nk’ikimenyetso cy’uko buriwese abyitayeho yabona umusaruro ufatika. Imyumbati ni kimwe mu bigihingwa ubushakashatsi bugaragaza ko bishobora kwitwara neza mu bihe bibi. Gutera imbuto nzima y’imyumbati no gukurikiza amabwiriza atangwa n’inzego z’ubuhinzi arimo gukoresha neza ifumbire mborera n’imvaruganda ni byo by’ingenzi umuhinzi asabwa kwitaho kugira ngo agere ku musaruro mwinshi ushoboka.

Alexis Namahoro