Mu Rwanda hatangiye ku mugaragaro imyiteguro ya shampiyona y'Isi mu magare

Nyuma yuko u Rwanda rwemerewe kuzakira Shampiyona y’Isi yo gusiganwa ku magare izaba mu 2025, irushanwa rizaba ribereye bwa mbere ku mugabane wa Afurika, kuri uyu wa Kane Ministeri ya Siporo n’Ishyirahamwe ry’Umukino w’Amagare ku Isi (UCI) bagiranye n’inzego zinyuranye ku bijyanye n’imyiteguro y’icyo gikorwa.

Ni igikorwa cyateguwe hagamijwe gushaka abafatanyabikorwa muri iyo gahunda mu gihe hasigaye imyaka 2 kugira ngo iryo rushanwa ribe.

Kuri uyu wa Kane kandi Minisitiri wa Siporo Aurore Mimosa Munyangaju, Umuyobozi (DG) w'Ishyirahamwe ry’Umukino w’Amagare ku Isi Amina Lanaya na Kayirebwa Liliane perezida w'Agateganyo rw'ishyirahamwe ry'umukino w'amagare mu Rwanda nibwo bafunguye ku mugaragaro ibikorwa byo kwitegura iyi Shampiyona izabera mu Mujyi wa Kigali mu mwaka wa 2025.

Ni igikorwa cyabereye muri Kigali Convention Center.

Muri Nzeri 2019 ni bwo abari bahagarariye u Rwanda n’Ishyirahamwe ry’Umukino w’Amagare bagejeje ubusabe bwabo mu Ishyirahamwe ry’Umukino w’Amagare ku Isi (UCI), basaba ko Umujyi wa Kigali wazakira Shampiyona y’Isi ya 2025, ubusabe bwaje kwemerwa mu mwaka wa 2021.

U Rwanda rwahawe kwakira Shampiyona y’Isi y’Amagare nyuma y’uko mu mwaka wa 2018 rwakiriye iya Afurika ndetse igenda ikagenda neza.

Minisitiri wa Siporo Aurore Mimosa Munyangaju. Photo: MINISPORTS

Umuyobozi (DG) w'Ishyirahamwe ry’Umukino w’Amagare ku Isi Amina Lanaya. Photo: MINISPORTS

Carine Umutoni