Abayobozi n’abakozi b’amakoperative bagiye kujya babanza kumenyekanisha imitungo yabo

Ni kenshi abanyamuryango b'amakoperative hirya no hino mu gihugu, bakunze kugaragaza ko imitungo yabo icunzwe nabi ndetse bamwe mu bayobozi bakayigira iyabo bwite.

Mu rwego rwo gukemura ibi bibazo, Ikigo cy'Igihugu gishinzwe amakoperative cyatangije icyumweru kigamije kwakira ibibazo bitandukanye biyagaragaramo mu Mujyi wa Kigali, bikajyana no kubasobanurira itegeko rigenga amakoperative ndetse no kubigisha uburyo bw'ikoranabuhanga bubafasha gusaba ubuzima gatozi.

Umuyobozi mukuru wa RCA, Dr Mugenzi Patrice yagaragaje ko kutubahiriza amategeko ari intandaro y’ibibazo biri mu makoperative, anatangaza ko hari ibyo umukozi n'umuyobozi ba koperative bazajya basabwa mbere yo kwinjira mu nshingano.

Uyu muyobozi yagaragaje ko barimo kubarura amakoperative akora n'adakora kuko hari ayo basanze ari aya baringa.

Ikigo cya RCA kigaragza ko mu Rwanda habarurwa amakoperative agera ku bihumbi 11, gusa ngo nyuma y'ubugenzuzi hazamenyekana umubare nyawo wa koperative ziri mu Rwanda.