WASAC iravuga ko bitarenze muri Kanama izaba yishyuye ingurane z’abafite ibikorwa byangijwe muri Kigali

Abaturage basaga 1000 mu Mujyi wa Kigali no mu nkengero zayo bafite ibikorwa byangijwe n’ahari gushyirwa ibikorwaremezo by’amazi, bavuga ko babariwe imitungo yangijwe ariko bategereje kwishyurwa baraheba.

Ikigo gishinzwe gukwirakwiza amazi isuku n’isukura cyo kirabizeza ko bazishyurwa bitarenze muri Kanama uyu mwaka.

Ibikorwa by’abaturage byangijwe no kwagura imiyoboro y’amazi n’ibindi bikorwaremezo nk’ibigega harimo imyaka, ibiti ndetse n’ubutaka bwabo.

Bavuga ko babariwe imitungo ariko kwishyurwa birananirana kandi barabizezaga ko bizakorwa vuba.

Ikigo gishinzwe gukwirakwiza amazi isuku n’isukura, WASAC kigaragaza ko mu baturage babaruwe ko bangirijwe imitungo bagomba guhabwa ingurane ari 9353 bababariwe amafaranga miliyari 6.398,919,603.

Kivuga ko muri bo abagera kuri 8,217 bishyuwe amafaranga miliyari 6 980,443,609 Frw, abatarishyurwa  ni 1,030 babariwe amafaranga y’u Rwanda miliyoni 247,636,287.

Mu murenge wa Kanombe mu tugari twa Busanza na Karama harabarurwa abaturage 111 bafitiwe amafaranga miliyoni 31 ,743,357 hishyuwe 2 gusa bahabwa miliyoni 1  na 999,055frwa, abasigaye 109 bazishyurwa miliyoni 29,744,329, hiyongeraho n’abo mu Murenge wa Gisozi 150 nabo batarishyurwa.

Umuyobozi ushinzwe gukurikirana ingurane z’ahashyizwe ibikorwaremezo by’amazi mu kigo WASAC,  Kajiwabo Joseph Poers  avuga ko abaturage batarishyurwa amafranga bazayahabwa bitarenze ukwezi kwa 8, kandi imishinga yo irakomeje n’abatarabarirwa hari itsinda riri kubikurikirana.

Kwagura imiyoboro y’amazi no kubaka ibigega ni gahunda ya Leta yo kugeza amazi meza ku baturage aho mu mwaka wa 2024 buri muturage azaba agerwaho n’amazi meza ku gipimo 100%