Umuyobozi wa Polisi ya Malawi yavuze ku Banyarwanda bakekwaho ibyaha bakiriyo

Umuyobozi wa Polisi ya Malawi Dr  George Hadrian  Kainja yasuye polisi y'u Rwanda, avuga ko igihugu cye kibamo  abanyarwanda benshi bamwe biyita impunzi, abandi bahashaka imibereho gusa ngo hari n'abari muri iki gihugu bashobora kuba ari abanyabyaha.

Abayobozi ba Polisi z’ibihugu byombi baganiriye ku mikoranire ya za  Polis, n’uburyo bakomeza gukorana.

Umuyobozi wa Polisi ya Malawa avuga ko Polisi y'u Rwanda imaze kwiyubaka ku buryo bugaragara, aho Polisi ya Malawi yamenya imikorere y'indege za Polisi y'u Rwanda, kurwanya inkongi n'uburyo polisi y'u Rwanda ikoresha mu kurwa ibyaha by'iterabwoba.

Uyu muyobozi Kandi avuga ko igihugu cya Malawi kibamo  abanyarwanda benshi bamwe biyita impunzi abandi bahashaka imibereho gusa ngo hari n'abari muri iki gihugu bashobora kuba ari abanyabyaha.

Avuga ko guhana amakuru ku mpande za Polisi z'ibihugu byombi bizafasha mu gutahura abanyabyaha bashobora kwihisha muri ibi bihugu by'u Rwanda na Malawi.

Uruzinduko rw'uyu muyobozi wa Polisi ya Malawi rubaye nyuma y'uko umuyobozi wa Polisi y'u Rwanda CG Dan Munyuza yagiriye uruzinduko muri Malawi muri Werurwe 2019.

Muri uru ruzinduko nibwo Polisi y'u Rwanda yasinyanye amasezerano y'ubufatanye hagati ya Polisi y'u Rwanda n'iya Malawi. Aya masezerano yasinywe hagati y'impande zombi arimo ubufatanye mu kurwanya ibyaha by'iterabwoba, kurwanya icuruzwa ry'abantu, kurwanya ibiyobyabwenge, ubufatanye mu guhugura abapolisi b'ibihugu byombi no guhanahana amakuru.