Urukiko rwo mu Bufaransa rwakomeje kumva abatangabuhamya bazi Claude Muhayimana

kuri uyu wa Mbere, Urukiko rw'i Paris mu Bufaransa ruburanisha imanza nshinjabyaha, rwakomeje kumva abatangabuhamya bazi Claude Muhayimana, umwe muri bo akaba ari nyirasenge. 

Nubwo yumviswe ari i Kigali yatumijwe na perezida w'urukiko ashingiye ku bubasha ahabwa n'amategeko, akaba yavuze ko umuryango we wahungiye kwa Muhayimana ndetse umugore we akajya aha Interahamwe amafaranga ngo zitabica kuko zahagabaga ibitero kuko hari n'abandi bari bahihishe.

Uwamubanjirije ni uba mu Bubiligi ariko warokokeye ku Kibuye. 

Uyu yagaragaje ko yabonye Muhayimana atwaye uwitwa Barayata wari OPJ kuri parquet ya Kibuye baca kuri Home St Jean bagenda gahoro cyane, akemeza ko banakubitanye amaso akabamenya. 

Nyuma yaho ngo hoherejwe aba GD 5 baza gutwara abo bajya kwica. 

Uyu mutangabuhamya akemeza ko abaje muri iriya modoka bari baje gutata ngo bamenye ko hari Abatutsi bahahungiye ngo bazaze kubica.

Undi urukiko rwumvise ni umusaza w'umuyisilamu wagiye gushyingura umujandarume witwa Mwafrika wiciwe mu gitero, ubwo abatutsi birwanagaho yabatera grenade bakayimusubizaho ikamuhitana. 

Umurambo we wajyanywe gushyingurwa mu Ruhengeri, uyu mutangabuhamya akaba yari mu modoka yawutwaye ya Daihatsu y'ubururu yatwawe na Muhayimana Claude. 

Yavuze kandi ko uwo murambo waraye ushyinguwe, ariko bararayo bukeye bongera kwirirwa mu Byangabo ariko barara ku Mukamira. 

Gusa ngo Muhayimana Claude we yararanaga n'abajandarume baherekeje uwo murambo.

Kuri iyi ngingo, Muhayimana Claude yari yarerekanye urwandiko rw'inzira rwerekana ko yamaze iminsi myinshi mu Ruhengeri, kuko hari ibitero bamushinja avuga ko byabaye ari mu Ruhengeri.

Gratien Hakorimana