Urukiko rw’Ubujurire rwashimangiye igihano cya burundu cyahanishijwe Munyagishari

Kuri uyu wa Gatanu, Urukiko rw'Ubujurire rwagumishijeho icyemezo cy'Urukiko Rukuru, Urugereko ruburanisha ibyaha Mpuzamahanga n'Ibyambuka imbibi, gihanisha Munyagishari Bernard igifungo cya burundu cyafashwe mu mwaka wa 2017.

Munyagishari yayoboye MRND mu cyahoze ari perefegitura ya Gisenyi aho yanakoreyemo ibyaha yahamijwe. Yagize uruhare rutaziguye mu gutegura umugambi wo kwica abatutsi akanajya no mu bitero bitandukanye byabahigaga.

Muri 2017, rumuhamya icyaha, Urukiko rwavuze ko yitabiriye inama zacurirwagamo umugambi wo kwica abatutsi agaha urubyiruko rw'interahamwe amabwiriza yo kubica no gufata abagore ku ngufu, kandi ngo akajya i Kigali kubashakira ibikoresho byo kubicisha birimo imihoro, amagrenade...

Munyagishari wari ukuriye Interahamwe zo mu mujyi wa Gisenyi, yatwaraga abatutsi bafatiwe ku mabariyeri akabajyana ahitwaga komine rouge ari naho bicirwaga, agatanga amabwiriza yo gucukura ibyobo byo kubashyiramo, ndetse akanashyiraho amatsinda y'abashoferi bagombaga kubamutwaza.

Muri 2017, Urukiko rwavuze ko rushingiye ku bukana bw'ibikorwa bya Munyagishari byari bigamije kwica no kurimbura abatutsi n'uburemere by'ingaruka zabyo, bigize impurirane y’icyaha cya Jenoside n'icyaha cyo kwica nk'icyaha kibasiye inyokomuntu rwategetse ko afungwa burundu.

Bernard Munyagishari yatawe muri yombi muri Gicurasi 2011 muri Repubulika Iharanira Demokarasi ya Kongo ashyikirizwa Urukiko mpuzamahanga mpanabyaha rwashyiriweho u Rwanda ICTR, na rwo rwamwohereje kuburanishirizwa mu Rwanda muri Nyakanga 2013.