Sous Lieutenant Nshimiyimana wo muri MRCD-FLN yavuze uko abana bashyirwaga mu gisirikare

Yanditswe May, 19 2021 14:42 PM | 36,478 Views

Urubanza ruregwamo Paul Rusesabagina n’abandi bari abayobozi n’abarwanyi b’umutwe wa MRCD-FLN, rwakomeje kuri uyu wa Gatatu, abaregwa bisobanura ku byaha bashinjwa.

Sous Lieutenant Nshimiyimana Emmanuel n’umwunganizi we basoje kwiregura, bagaragaza uburyo ngo yinjijwe ku gahato mu mutwe w’ingabo zitemewe n’uw’iterabwoba.

Bombi basobanuye ko iyo mitwe yagiye ishyira abana mu gisirikari ku ngufu ibasanze ku mashuri, mu nsengero cyangwa mu miryango iwabo.

Yavuze ko ngo no mu gihe babemereraga gusubira kwiga, babashyiragaho ababacunga ngo batazatoroka.

Ibi babishingiraho basaba ko kuba yarakoreshejwe ibyaha ku ngufu n’agahato, adashobora kwigobotora atazabiryozwa nk’uko amategeko abiteganya, ndetse ngo ibi bikaba byarakozwe kuri bagenzi b’uyu uregwa bajyanywe i Mutobo gufashwa kujya mu buzima busanzwe.

Me Mugabo Sharif Yusuf wunganira Sous Lieutenant Kwitonda André, Hakizimana Theogene na Ndagijimana Jean Chrétien, yagaragaje uburyo impunzi zashyirwagaho iterabwoba kugira ngo zinjire mu mitwe irwanya u Rwanda, nko kubumvisha ko bahigwa n’ingabo z’u Rwanda zishaka kubica, cyangwa se ko mu Rwanda hari inzara, kuvuga ko utashye afungwa cyangwa akicwa n’ibindi.

Yavuze ko ibi byatumaga ngo bumva batataha, ndetse bakabwirwa ko bagomba kujya mu ngabo z’iyo mitwe.

Yavuze ko uwabaga yageze muri iyi mitwe ngo kuyivamo bitabaga byoroshye, kubera gutinya ibihano birimo no kwicwa ndetse n’icengezamatwara yakoraga.

Gusa aba baburana batemera kugira uruhare mu bikorwa by’iterabwoba, bibaza impamvu batajyanywe mu kigo cya Mutobo ngo basubizwe mu buzima busanzwe, ahubwo bigakorwa ku bafatiwe mu mirwano, harimo n’abayoboraga umutwe wa FLN ari nabo babahaga amabwiriza yose bagenderagaho.

Hakorimana Gratien

Sangiza abandi kuri