Rubavu: Uko hahanzwe imishinga ikomeje gufasha mu iterambere ry'abarokotse Jenoside

Abarokotse Jenoside yakorewe Abatutsi mu Karere ka Rubavu, barashima inkunga yatewe imishinga yabo y’ubuhinzi, ubworozi n’ubucuruzi ubu ikaba yarahinduye imibereho yabo.

Mu murima w’ibigori wa koperative y’abarokotse jenoside yakorewe Abatutsi batuye mu mudugudu w’icyitegererezo wa Nyabishongo mu Murenge wa Mudende, barasarura ibigori, nyuma yo kugurwa bigapakirwa imodoka ibyerekeza ku isoko.

Ni ubuhinzi bufatanywa n'ubw’ibirayi hamwe n’ubworozi bw’Inka 37.  

Imiryango 52 yarokotse Jenoside yakorewe Abatutsi ituye mu Mududugu wa Mudende ihamya ko inkunga yatewe imishinga yabo, bahereye nko kuba Inka boroye zibakamirwa, yahinduye imibereho yaho ku buryo bugaragara.

Usibye abakora ubuhinzi n'ubworozi, hari abandi bakora ubucuruzi batuye muri Muhira mu Murenge wa Rugerero, harimo n’abahawe inkunga y'amafaranga ibihumbi 500 batangiye kuyakoresha mu bucuruzi kandi umusaruro wabwo uraboneka.

Umuryango Ibuka mu Karere ka Rubavu uvuga ko inkunga ikenewe itaragera ku miryango yose y’abarokotse jenoside yakorewe Abatutsi, ariko harimo gushakwa bisubizo mu bufatanye n’abafatanyabikorwa. 

Ibuka mu Karere ka Rubavu ivuga ko urwego rw’abikorera rwabemereye Inka zizorozwa imiryango y’abarokotse jenoside yakorewe Abatutsi, iyi nayo ikaba yitezweho kuzafasha abarokotse mu kwiyubaka kwabo no kwiteza imbere.