Rubavu: Imwe mu miryango ituriye Sebeya ikaba itarimurwa irasaba gukurwa mu gihirahiro

Abaturiye umugezi wa Sebeya muri metero 10 na 50 ariko bakaba batarimuwe, barasaba gukurwa mu gihirahiro, bakamenya niba kuri ubu bakubaka bakanavugurura inzu zabo, cyangwa se niba ibyo bakomeje kubwirwa ko bimuka bizaba.

Imiryango yari ituye muri metero 10 uvuye ku mugezi wa Sebeya yarimutse, inzu zimwe zirasenywa, icyakora hari izindi nzu ziri hagati ya metero 10 na 50 zashyizweho ikimenyetso ko nazo zigomba kuvaho, ariko na magingo aya, abazituyemo bari mu rujijo, ntibazi niba nabo barebwa no kwimuka.

Harebwe uburyo ibungabungwa rya Sebeya riri gukorwa hubakwa inkuta, aba bafite inzu muri metero kugeza kuri 50 basanga bakemererwa kuvugurura, kuko bakeka ko Sebeya itazongera kuba ikibazo.

Ubuyobozi bw’Akarere ka Rubavu buvuga ko inzego zitandukanye z’ubuyobozi zitarafata icyemezo niba abo baturage bagomba kuguma aho bari batuye cyangwa niba  bazimurwa.

Ubuyobozi bw’Akarere ka Rubavu bugaragaza ko nubwo abo baturage bakiri ahantu hashyira ubuzima bwabo mu kaga kuko ibyakozwe kuri uyu mugezi wa Sebeya bitarangira, ngo nta mpungenge zikwiye kubaho, hateguwe ahantu habugenewe abaturage bajyanwa mu gihe hakongera kubaho imyuzure itewe n'imvura nyinshi.