Polisi y'u Rwanda irasabirwa kongera guhabwa ububasha bwo kugenza ibyaha

Inteko rusange y'Umutwe w'Abadepite yemeje ishingiro ry'Umushinga w’itegeko rigenga Polisi y’u Rwanda.
 
Mbere yo kwemeza ishingiro ry'uyu mushinga w'itegeko abadepite  babajije ibibazo batanga n'ibitekerezo   bizagenderwaho igihe uyu mushinga w'itegeko uzaba watangiye gusuzumwa ku rwego rwa komisiyo.
 
Aha bakaba batinze ku ngingo iha polisi y'igihugu ububasha bwuzuye mu kugenzaha ibyaha bibangamira umutekano wo mu muhanda,mu mazi no mu nzira za gariyamoshi ,n'ububasha bw'ubugenzacyaha bw'ibanze ku bindi byaha mu gihe bibaye ngombwa.

Batinze kandi ku ngingo zirimo  isaba ko abapolisi batoroka mu kazi bajya bakurikiranwa n'inkiko. Ndetse n'ingingo yaha ububasha polisi kwereka itangazamakuru  bamwe mu bakekwaho ibyaha n'amakosa hagamijwe ubukangurambaga no kwereka abaturage ibibakorerwa.
 
Agaruka kuri izi ngingo,Minisitiri w'Umutekano mu Gihugu Alfred Gasana yavuze ko uyu mushinga w'itegeko ugamije kwimakaza  umutekano w'igihugu, ubunyamwuga mu kazi k'abapolisi ndetse no gukumira ibyaha .

Ibikorwa by’inteko rusange y’umutwe w’abadepite kuri uyu wa Kane byakozwe hifashishijwe ikoranabuhanga bikaba byabanjirijwe no kwemeza gahunda y’igihembwe kidasanzwe.
 

Jean Paul MANIRAHO