Perezida w'Urukiko rw'Ikirenga yavuze ko abanyamakuru bagiye koroherezwa kubona amakuru mu nkiko

Perezida w'urukiko rw'ikirenga aratangaza ko binyuze mu bugenzuzi bukuru bw'inkiko abanyamakuru bagiye kujya boroherezwa kubona amakuru ajyana n'ibibera mu nkiko.

Ibi perezida w'urukiko rw'ikirenga Dr Ntezilyayo Faustin yabitangarije mu kiganiro n'abanyamakuru nyuma yo gutangiza amahugurwa y'abanyamakuru agamije kubongerera ubumenyi ku bijyanye no gutara amakuru arebana n'ubutabera.

Ikibazo cyo kubona amakuru mu nkiko cyakomeje kugaragazwa nk'imbogamizi ku banyamakuru aho itegeko ribasaba kubanza kwandikira urukiko bibasaba ariko rimwe na rimwe bagatinda gusubizwa,bakaba bakererwa kubona amakuru ku manza zaciwe cyangwa imyanzuro yafashwe n'inkiko.

Perezida w'urukiko rw'ikirenga Dr Faustin Ntezilyayo yavuze ko iki kibazo cyahawe umurongo wo kugikemura cyane ko n'inzego z'ubutabera zifite inyungu ku gutangazwa kw'imyanzuro yafashwe mu nkiko.