Perezida Kagame yitabiriye inama ivuga ku ruhererekane rwa serivisi zituma haboneka ibiribwa

Kuri uyu wa Mbere, Perezida Paul Kagame yagejeje ijambo ku bitabiriye inama ivuga ku ruhererekane rwa serivisi zituma haboneka ibiribwa yateguwe n’umunyamabanga mukuru wa Loni, Antonio Guterres ikaba yakiriwe na Minisitiri w’Intebe w’u Butaliyani, Mario Draghi.

Ni inama itegura indi yaguye iziga kuri iyi ngingo muri Nzeri uyu mwaka,  zombi zigamije kureba uko habaho guhuza icyerekezo ku birebana no kwihaza mu biribwa nk’uko biteganywa mu ntego z’iterambere rirambye, SDGs.

Perezida Kagame ari na we uyoboye gahunda ya NEPAD y’Iterambere mu Muryango wa Afurika Yunze Ubumwe, yagaragaje ibikwiye kwitabwaho kugira ngo umugabane wa Afurika wihaze mu biribwa kandi bifite intungamubiri zikenewe.

Muri ibyo umukuru w’igihugu, yavuze ku gufasha abahinzi gukoresha ikoranabuhanga rigezweho, kugira ubwishingizi bw’ibihingwa buhamye n’ibindi.

Yagaragaje ko biteganyijwe ko mu cyerekezo 2063 Afurika yihaye, birimo kugaburira abana ku mashuri, guteza imbere inganda zitunganya ibikomoka ku buhinzi, kwita ku bucuruzi bw’ibiribwa muri Afurika, guteza imbere ubushakashatsi, gushyigikira amakoperative y’abahinzi n’ay’abagore by’umwihariko no gushyiraho uburyo buburira hakiri kare mu gihe hari imihindagurikire y’ikirere.