Perezida Kagame yaganiriye na Benedict Oramah uyobora Afreximbank

Perezida Kagame yakiriye Perezida akaba n’Umuyobozi w’Inama y’Ubutegetsi ya Banki Nyafurika ishinzwe guteza Imbere Ibyoherezwa n’Ibitumizwa mu Mahanga, Afreximbank, Prof Benedict Okechukwu Oramah, muri Village Urugwiro, kuri uyu wa Kane, tariki ya 21 Werurwe 2024.

Umukuru w’Igihugu yakiriye Prof Benedict Okechukwu wari kumwe n’Umuyobozi w'Inama y'Ubutegetsi y'Ikigega Nyafurika cy'Iterambere ry’Ubucuruzi bwohereza ibintu mu Mahanga, FEDA, Marlene Ngoyi Mvidia n'abanyamuryango bacyo babiri; Rosa Whitaker na Dr. Sidi Ould Tah. 

Yabakiriye nyuma y'umunsi umwe FEDA ifunguye ibiro byayo bikuru mu Mujyi wa Kigali.

FEDA ni Ikigega gishamikiye kuri Afreximbank, cyatangiranye ishoramari rya miliyoni 770$. Cyashyizweho hagamijwe gushyigikira imishinga yo muri Afurika, guteza imbere urwego rw’abikorera ndetse no korohereza abaturage b’uyu mugabane kungukira ku Isoko rusange rya Afurika.

Iki kigega cyitezweho gufasha mu rugendo rugana kuri Gahunda ya 2063 y’Umuryango wa Afurika Yunze Ubumwe, ijyanye n’impinduka zikenewe mu by’ubukungu bwa Afurika no kwihutisha iterambere ryawo.

U Rwanda rwatoranyijwe kwakira icyicaro cya FEDA ku Mugabane wa Afurika hashingiwe ku buryo rworohereza abashoramari ndetse n’uko abarugana barimo abanyamahanga bafashwa kubona visa barugezemo. 

Safa Claudia Uwingeneye