Perezida Kagame ari muri Angola

Perezida wa republika Paul Kagame ari i Luanda muri Angola, aho yatangiye uruzinduko rw’akazi rw’iminsi 2. Kuri uyu munsi wa 1 w’uru ruzinduko, perezida Kagame aragirana ibiganiro na mugenzi we wa Angola João Lourenço, biza gukurikirwa no kwakira ku meza perezida Kagame.

Uru ruzinduko ruri mu rwego rwo gushimangira umubano w’ibihugu byombi bisanzwe bifitanye ubutwererane n’ubufatanye mu birebana n’ingendo zo mu ndege, umutekano, ubutabera, abinjira n’abasohoka, ikoranabuhanga mu itumanaho n’isakazabumenyi, ICT ndetse no mu miyoborere.

Ku munsi wa 2 w’uru ruzinduko abakuru b’ibihugu by’u Rwanda na Angola biteganyijwe ko bazaganira n’itangazamakuru.