Nyabihu: Inka 12 z’umuturage zatemwe n’abagizi ba nabi

Nyabihu Inka 12 z’umuturage witwa Ndabarinze Kabera zatemwe n’abagizi ba nabi ku wa Mbere tariki 25 Werurwe 2019. Mu nzuri za Gishwati mu Mudugudu wa Gakamba mu Kagari ka Mulinga mu murenge wa Mulinga mu Karere ka Nyabihu hatemwe inka 12 z’umuturage witwa Ndabarinze Kabera.

Ubu bugizi bwa nabi bwakoze n’abantu kugeza ubu bataramenyekana bwahitanye inka 10 z’uyu muturage, 2 zakomeretse bikomeye mu gihe indi imwe yaburiwe irengero. 

Ubuyobozi bw’Akarere ka Nyabihu burahumuriza abaturage ko bufatanije n’inzego zishinzwe umutekano bugiye kuwukaza muri kariya gace.

Mukandayisenga Antoinette, uyobora aka Karere ka Nyabihu, wari kumwe n’inzego zishinzwe umutekano bageze ahabereye aya mahano, yavuze ko iki gikorwa ari indengakamere yizeza abaturage ko bafatanije n’inzego zishinzwe umuteakano bagiye kuwukaza muri kariya gace.

Uyu muyobozi kandi yavuze bafatanije n’abafatanyabikorwa b’Akarere bagiye kureba uburyo uwahuye n’ibi byago yashumbushwa.

Abantu 16 biganjemo abashumba baragira inka muri Gishwati nibo bamaze gutabwa muri yombi n’Urwego rw’Igihugu rushinzwe iperereza ngo akaba ari bo bazafasha kumenya neza ikihishe inyuma y’ubu bugizi bwa nabi.

Inkuru ya Uwimana Emmanuel