Minisitiri Gatabazi yasabye Abunzi batowe kuzarangwa n’ubunyangamugayo

Kuri uyu wa Gatandatu mu gihugu hose hatowe abagize komite z'abunzi ku rwego rw'Akagari, ndetse n'abakandida bazajya gutorwamo abunzi bo ku rwego rw'umurenge.

Hatagize igihunduka amatora y’abunzi ku rwego rw’Umurenge akaba ateganyijwe kuwa Gatandatu w’ icyumweru gitaha

Bamwe mu baturage bagaragaza icyizere bafitiye komite z'abunzi ku rwego rw'Akagari bavuga ko bizeye ko ibibazo byabo bizarangirira mubuzi aho gusiragira mu nkiko.

Komite  y'abunzi ku rwego rw'Akagari igizwe n'abunzi 7 n'abasimbura 10, naho inteko itora ikaba inama njyanama y'akagari.

Ku ruhande rw'abatorewe kuba abunzi, bavuga ko biteguye gukorana umurava mu gukemura ibibazo bishobora kuvuka hagati mu baturage.

Minisitiri w'Ubutegetsi bw'igihugu, Jean Marie Vianey Gatabazi ashima umusanzu watanzwe n'abunzi bacyuye igihe asaba abatowe kuzaba inyangamugayo.

Imibare ya minisiteri y'ubutabera igaragaza ko kuva mu mwaka wa 2015 komite z’abunzi zicyuye igihe zitorwa zakiriye imanza ibihumbi 297,695 zikaba zaraciwe ku kigero cya 98%. 

Biteganyijwe ko abakandida 6 batowe kuri buri kagari bazahurira ku murenge kugirango nabo batorwemo abunzi 7 n'10 b'abasimbura ku rwego rw'umurenge.

Mbabazi Dorothy