Madamu Jeannette Kagame yasabye ko hafatwa ingamba zikarishye mu guhangana n'icyaha cyo gusambanya abana

Madamu wa Perezida wa Repubulika Jeannette Kagame yasabye ko hafatwa ingamba zikarishye mu guhangana n'icyaha cyo gusambanya abana b'abakobwa ndetse ko imanza z'abakekwaho cg abahamijwe iki cyaha zigomba kwihutihwa. Yabitangaje kuri uyu wa mbere ubwo hatangizwaga ubukangurambaga bwo kurwanya gusambanya abana.

Imibare y'urwego rw'Igihugu rw'ubugenzacyaha RIB igaragaza ko mu myaka 3 ishize rwakiriye ibirego by'abana 10.456 basambanijwe, 98% byabo bakaba ari abakobwa. Uru rwego runavuga ko,muri iki gihe cya Covid 19 ibyaha byo gusambanya abana byagaragaye. Nko mu mezi 3 y'igihe cya guma mu rugo ni ukuvuga kuva mu kwa 3 kugeza mu kwa 6 hasambanijwe abana 864 mu gihe kuva mu kwa 6 kugeza mu kwa 8 hasambanijwe abana 1310.

Mu butumwa yatanze hifashishijwe ikoranabuhanga, madamu wa Perezida wa Repubulika Jeannette Kagame yasabye buri wese kwamagana abantu bakuru bangiza abana.