AMAFOTO: Abaturage basabwe kwirinda ibikorwa byose byatuma bahura bakanduzanya Covid19

Guverinoma irasaba abaturage kwirinda ibikorwa byose byatuma bahurira mu ngo zabo, cyane ko ibi byose ari kimwe mu bituma ubwandu bw’icyorezo cya Covid-19.

Ibi byagarutsweho kuri uyu wa Kabiri, mu kiganiro n'itangazamakuru, cyibanze ku ngamba nshya zo gukomeza guhangana na Coronavirus.

Zimwe muri izo ngamba harimo ko ingendo zibujijwe guhera saa kumi n'ebyiri za nimugoroba (6:00 PM), kugeza saa kumi za mu gitondo (4:00 AM).

Minisiteri y’Ubuzima igaragaza ko 95% by’abantu barenga ibihumbi 9 basanganywe icyorezo cya COVID19  kugeza kuri uyu wa kabiri, nta bimenyetso bagaragaza bityo ko benshi muri bo bakurikiranwa bari mu ngo zabo.

Minisante ivuga ko iyi  gahunda ikomeje gufasha cyane abasanganywe iki cyorezo, ndetse n’inzego z’ubuzima mu gukurikirana aba basanganywe iki cyorezo.

Minisitiri w’Ubutegetsi bw’igihugu, Jean Marie Vianney Gatabazi  avuga ko hari abasangwa mu miryango irimo abarwaye iki cyorezo, baje kubasura cyangwa kubasengera.

Minisitiri Gatabazi asaba abaturage  kwirinda ibi bikorwa, kuko ari kimwe inzego zibanze zasanze kirigukwirakwiza iki cyorezo.

Umuyobozi mukuru wa Polisi CG Dan Munyuza avuga ko hari ababifatirwamo bapimwa bagasanga bafite iki cyorezo.

Polisi y’igihugu ishimangira ko ibikorwa byo gusurana koko biriho, kuko hari ababifatiwemo.

Ibi akabihuza n’ igisubiza gihabwa abakunze kugaragara ku mbuga nkoranyambaga basaba ko hatashyirwaho ingamba zikakaye mu kwirinda harimo izwi nka Guma mu rugo.

Minisiteri y’Ubuzima igaragaza ko ubwandu bushya bwikubye inshuro 4 ubwari busanzwe muri uku kwezi kwa Gatandatu, kandi ko ubwiyongere bw’iyi mibare butuma n’imibare yabitabwaho mu bitaro harimo nabakenera kwitabwaho byihariye wiyongera. 

Fiston Felix Habineza