Ishuri rikuru rya Muhabura ryahaye impamyabumenyi abanyeshuri 182

Ishuri rikuru rya Muhabura (Muhabura Integrated Polythechnic College) riherereye mu karere ka Musanze, ryahaye impamyabumenyi y’icyiciro cya mbere cya Kaminuza (Advanced Diploma) abanyeshuri 182.

Minisiteri y’Uburezi yasabye abasoje amasomo guhanga udushya, kuko amahirwe agihari nubwo isi yugarijwe n’icyorezo cya COVID-19.

Ni umuhango witabiriwe n’abantu bake abandi bawukurikira hifashishijwe ikoranabuhanga mu rwego rwo kwirinda COVID-19.

Babiri mu banyeshuri bari bahagarariye bagenzi babo, bavuze ko bashingiye ku bumenyi bahawe biteguye kuba umusemburo w’iterambere.

Umuyobozi w’ikirenga w’ishuri rikuru rya Muhabura, Dr Bishop Samuel Mugiraneza Mugisha yavuze ko nubwo amasomo yatanzwe mu bihe bidasanzwe by'icyorezo cya COVID-19 ariko bitabujije ko akomeza uko bikwiye.

Hifashishijwe ikoranabuhanga, Umunyamabanga wa Leta muri Minisiteri y’Uburezi ushinzwe ikoranabuhanga, imyuga n’ubumenyingiro Irere Claudette, yasabye abarangije amasomo yabo mu mashami atandukanye kwimakaza ikoranabuhanga mu guhanga  udushya cyane cyane muri ibi bihe isi yugarijwe n’icyorezo cya COVID-19.

Abarangije amasomo y’icyiciro cya mbere cya Kaminuza mu ishuri rikuru rya Muhabura barimo abakobwa 61 n’abahungu 121.

Uko ari 182 barangije mu mashami y’ubwubatsi, amashanyarazi, ikoranabuhanga, ibaruramari, ubutetsi n’amahoteri ndetse n’ubukerarugendo.