Inzego zose zishyize hamwe ihohoterwa rishingiye ku gitsina n'irikorerwa abana ryacika-Gatabazi

Mu biganiro byahuje Polisi y'u Rwanda, itangazamakuru, urubyiruko rw'abakorerabushake ndetse n'inzego zitandukanye, Minisitiri w'Ubutegetsi bw'igihugu, Jean Marie Vianney Gatabazi yavuze ko inzego zose zishyize hamwe ihohoterwa rishingiye ku gitsina n'irikorerwa abana ryacika burundu.

Bamwe mu banyamakuru ndetse n'urubyiruko rw'abakorerabushake, basanga ikibazo cy'ihihoterwa rishingiye ku gitsina ndetse n'irikorerwa abana gihangayikishije, bakavuga ko bafatanyirije hamwe mu gutanga amakuru ku hagaragara iki cyaha, ihohoterwa ryacika.

Umuyobozi wa Polisi y'u Rwanda, CG Dan Munyuza ashima uruhare rw'itangazamakuru mu rugamba rwo kurwanya ihoterwa rishingiye ku gitsina, avuga ko kuba polisi y'u Rwanda itegura ibiganiro nk'ibi ari umwanya wo kurushaho gufata ingamba zatuma ihohoterwa ricika.

Minisitiri w'Ubutegetsi bw'igihugu, Gatabazi Jean Marie Vianney yavuze ko itangazamakuru rikwiye kwibanda ku nkuru zicukumbuye zigaragaza ibyaha by'ihoterwa, ariko kandi hakanagaragazwa n'ibyagezweho mu kurikumira.

Avuga ko “Ubufatanye bw'inzego zose burakenewe mu kurwanya ihoterwa rishingiye ku gitsina n'irikorerwa abana.”

Kuva muri Mutarama uyu mwaka kugeza muri Kanama, abana  basambanyijwe ni 3,877 abagore n'abakobwa bafashwe ku ngufu ni 954, abakorewe ihohoterwa rishingiye ku gitsina n'abo bashakanye ni 2,350.

Mbabazi Dorothy