ITEGANYAGIHE: Imvura yo muri Mata ishobora kuzaba nyinshi

Ibipimo byafashwe mu mpera z'ukwezi kwa Werurwe gushira, byerekana ko mu ntangiriro z'ukwezi kwa Mata hashobora kugwa imvura nyinshi, nk'uko bitangazwa n'Umuyobozi mukuru w'Ikigo cy'Igihugu gishinzwe ubumenyi bw'ikirere, Gahigi Aimable.

Uyu muyobozi aburira abaturage guhora bakurikirana amakuru n'impinduka zayo.

''Amakuru tuba dufite n'ibipimo by'iteganyagihe by'ibyumweru bigiye kuza uhereye kuri uyu wa Mbere tariki 1 Mata 2019 arerekana ko iminsi 4 ya mbere ariyo ifite imvura iri hejuru ya mm 40 ahantu henshi hatandukanye, ugereranyije n'iyo minsi, iminsi ine ya mbere niyo ifite imvura nyinshi. Umuturage ni uko yakurikira amakuru ya buri munsi kuko impinduka duhita tuzigaragaza,'' Gahigi Aimable- Umuyobozi Mukuru/ RMA

Abenshi mu baturage bamaze kubona ububi n'ingaruka z'ibiza cyane cyane ibiterwa n'imvura nyinshi, bavuga ko mu kwirinda ibiza bagomba kugenzura imyubakire yabo, kuyobora amazi y'imvura ashobora kubasenyera no gutera amashyamba agabanya ubukana bw'imiyaga ku buryo burambye.

Minisitiri w'Ibikorwa by'Ubutabazi Eng. Kamayirese Germaine arahamagarira abaturage kwitwararika muri ibi bihe by'imvura.

Minisiteri Ishinzwe Ibikorwa by'Ubutabazi, itangaza ko kuva mu mpera z'ukwezi kwa Gashyantare abantu 35 batakaje ubuzima bazize ibiza habariwemo n'abaguye mu birombe bicukurwamo amabuye y'agaciro i Rwamagana.

Inzu 2.700 zasakambuwe n'imiyaga izindi zisenywa n'imvura na ha zisaga 5000 z'imyaka yangijwe n'urubura.

Inkuru ya John BICAMUMPAKA