I Kigali hateraniye inama yiga ku kurwanya ihohoterwa rishingiye ku gitsina

Inzobere mu buzima bwo mu mutwe ziteraniye i Kigali mu nama mpuzamahanga y'iminsi 3 ku ihohoterwa rishingiye ku gitsina mu bihugu bigize Akarere k'Ibiyaga Bigari; ari byo u Burundi, Repubulika Iharanira Demokarasi ya Congo n'u Rwanda.

Iyi nama yatangiye kuri uyu wa  Mbere tariki 27 Gicurasi 2019.

Muri iyi nama, izi mpuguke zavuze ko ihohoterwa rishingiye ku gitsina ritagira ingaruka zikomeye ku buzima bw'uwarikorewe gusa, ko rinahungabanya umuryango muri rusange. 

Izi nzobere zivuga ko igihe kigeze kugira ngo guhangana n'ingaruka z'ihohoterwa birenge ubuvuzi n'ubufasha bihabwa uwarikorewe ahubwo byaguke bigere mu muryango kugira ngo no kurirandura mu buryo bufatika bishoboke. 

Zigaragaza ko hakiri imbogamizi y'amikoro agenerwa ibikorwa bijyanye no guhangana n'ihohoterwa ndetse n'ingaruka zaryo, kuko ku Isi yose muri rusange ibyo bikorwa bigenerwa atarenze 1% by'ingengo y'imari. 

Umuryango w'abibumbye uvuga ko byibura umugore cyangwa umukobwa 1 muri 5 aba yarahuye n'ihohoterwa rishingiye ku gitsina, mu gihe 1/3 cy'ibihugu binyamuryango bitarashyiraho amategeko ahana ihohoterwa rikorerwa umugore mu gihe arikorewe n'uwo bashakanye.