Hamuritswe ubushakashatsi bugaragaza uko u Rwanda rwahanganye na COVID19 hubahirizwa uburenganzira bwa muntu

Ubushakashatsi bwakozwe na Komisiyo y'Igihugu y'Uburenganzira bwa muntu ishima uburyo u Rwanda rwitwara mu guhangana n'icyorezo cya Covid 19 hanubahirizwa uburenganzira bwa muntu. Yabigaragaje kuri uyu wa kane ubwo hizihizwaga isabukuru y’imyaka 72 y'itangazo Mpuzamahanga ryerekeye Uburenganzira bwa Muntu.

Ubu bushakashatsi ku iyubahirizwa ry'Uburenganzira bwa Muntu bwakozwe kuva mu kwezi kwa 3 kugeza mu kwa 10 uyu mwaka mu turere 15 hirya no hino mu gihugu. Perezida w'iyi komisiyo Mukasine Marie Claire asobanura ko inzego zitandukanye zigomba gukomeza gutahiriza umugozi umwe, kugira ngo n'ahagaragara ibibazo bibashe kubonerwa umuti mu gihe hari abakirenga ku mabwiriza yo kwirinda iki cyorezo cya Covid 19.

Ibyavuye muri ubu bushakashatsi binagaragaza ko ingamba guverinoma yashyizeho zari zigamije kurengera ubuzima bw’abantu n'ubwo hari bamwe batahise bazakira neza.

Imiryango mpuzamahanga na sosiyete sivile ishingiye kuri iyi raporo na yo ishima uburyo u Rwanda rukomeje kwitwara mu guhanganda na Covid 19 hanubahirizwa uburenganzira bwa muntu.

Minsitiri w'Ubutabera akaba n’Intumwa Nkuru ya Leta, Johnston Busingye avuga ko uburyo icyorezo giteye ibyakozwe mu gushyira mu bikorwa ingamba zo kwirinda byari bikurikije amategeko.

Komisiyo y’Igihugu y'Uburenganzira bwa muntu yishimira intambwe imaze kugeraho mu kuzuza inshingano zayo zijyanye no guteza imbere no kurengera uburenganzira bwa muntu.

Bienvenue Redemptus