Gakenke: Bubakiwe ibiraro byo mu kirere mu rwego rwo koroshya ubuhahirane

Abatuye imirenge ya Nemba na Gashenyi yo mu Karere ka Gakenke barashima ko ibiraro byo mu kirere bubakiwe byoroheje imigenderanire ibahuza n’utundi duce byari bigoye kugeramo.

Mu Murenge wa Nemba hari ikiraro cyo mu kirere gihuza utugari twa Gisozi na mucaca gifite uburebure bwa metero zisaga 100.

Cyaje ari igisubizo ku batuye muri utwo tugari n’aberekeza mu bice bindi.

Mu murenge wa Gashenyi Naho hubatswe ikiraro cyo mu kirere gihuza abatuye utugari twa Taba na Rutenderi bari baraheze mu bwigunge.

Aba baturage bashimira ubuyobozi bwabegereje ibi bikorwaremezo.

Uretse aha muri Nemba na Gashenyi, ibiraro nk’ibi byubatswe no mu Mirenge ya Busengo, Mugunga, Mataba na Minazi, bikaba bibahuza n’indi mirenge baturiye ndetse n’akarere ka Nyabihu.

Ubuyobozi bw'Akarere ka Gakenke bwasabye abaturage kubungabunga ibi biraro babirinda abashaka kubyangiza bavanaho ibyuma bajya kugurisha.

Mu ngengo y’imari y’umwaka ushize wa 2022/2023 mu Karere ka Gakenke hubatswe ibiraro bine byo mu kirere byatwaye arenga miliyoni 600 Frw.

 Robert Byiringiro.