Dr Nsanzabaganwa yagaragaje ko ubutunzi bwa Afurika butagaragarira gusa ku mutungo kamere

Yanditswe Aug, 16 2023 16:57 PM | 135,155 Views

Umuyobozi wungirije wa Komisiyo y'Umuryango wa Afurika Yunze Ubumwe, Dr. Monique Nsanzabaganwa yagaragaje ko ubutunzi bwa Afurika butagaragarira ku mutungo kamere gusa, ahubwo ko buri mu bigo bito n'ibiciriritse bikorera kuri uyu mugabane, cyane cyane ibyashinzwe n'abagore n'urubyiruko.

Yabitangaje kuri uyu wa Gatatu ubwo i Kigali hatangiraga inama y'ihuriro ya Golden Business, ihuriza hamwe inzego zinyuranye zifite aho zihurira n'ubukungu n'ishoramari, ku nsanganyamatsiko igaruka ku kubaka ubukungu cyangwa ubutinzi bwa Afurika binyuze mu isoko rusange rya Afurika.

Ni inama y'iminsi 3 igamije kugaragaza amahirwe y'ishoramari ari mu Rwanda, no guha urubuga abashoramari kuganira no kungurana ubumenyi mu bijyanye n'ubukungu n'ishoramari.

Dr Nsanzabaganwa yavuze ko AfCFTA ari ihuriro ry'ubucuruzi bwafasha kwihutisha iterambere rya Afurika binyuze cyane cyane muri ibyo bigo bito n'ibiciriritse.

Yahaye ubutumwa abikorera na za guverinoma bubasaba guha amahirwe buri wese nta n'umwe usigaye inyuma, kuko aribwo buryo bwonyine buzatuma bashobora kubaka umutungo wa Afurika.

Minisitiri w'Ubucuruzi n'Inganda, Dr Jean Chrysosthome Ngabitsinze yabwiye abitabiriye iyi nama, ko AfCFTA ari amahirwe ahuza abikorera kugira ngo barebere hamwe aho bashora imari.

Yavuze ko uyu ari umwanya wo kuganira ku mahirwe ahari aganisha ku kubaka ubukungu n'ubutunzi bwa Afurika.

Yavuze ko mbere na mbere uyu ari umwanya w'abikorera, aho guverinoma icyo isabwa ari ugushyiraho amategeko afasha gahunda z'abikorera gutanga umusaruro.