Aborozi muri Nyagatare baravuga ko amakusanyirizo y’amata yabuze ubushobozi buyakira

Ihuriro ry’aborozi bo mu karereka Nyagatare, riravuga ko rihangayikishijwe n’uko amakusanyirizo y’amata adafite ubushobozi bwo kuyakira yose, kubera ko nta bikoresho bihagije afite kandi umukamo w’amata ukaba wariyongereye.

Akarere ka Nyagatare kabarizwamo amakusanyirizo y’amata 16, nyamara ngo  60% byayo makusanyirizo abura ubushobozi bwo kwakira ingano y’umukamo w’amata uboneka.

Nk’ikusanyirizo ry’amata rya Kamate  na Musheri, ubuyobozi buvuga ko litiro ibihumbi bine z’amata arizo zisaguka.

Umuyobozi w’ihuriro ry’amakoperative y’aborozi muri aka karere, Gahiga Gashumba  avuga ko iki ari ikibazo gihangayikishije mu buryo bukomeye.

Umuyobozi w’akarere ka Nyagatare, Mushabe David Claudian avuga ko mu gukemura ibibazo by’ibikoresho bidahagije, amakusanyirizo yagiriwe inama yo kugana ibigo byimari ngo babone ubushobozi bwo kwishakamo ibisubizo.

Ubushobozi buke bw’amakusanyirizo y'amata mu kwakira umukamo wose uboneka muri aka karere, buravugwa mu gihe kurundi ruhande hakomeje ubukangurambaga mu borozi kugirango hongerwe umukamo uzabasha guhaza uruganda rwitezweho kubakwa muri aka karere.

Uru ruganda ngo ruzaba  rutunganya amata y’Ifu rukazakenera litiro ibihumbi 500 ku munsi.