Abivuriza ku kigo nderabuzima cya Kinigi bishimiye serivisi zacyongewemo

Abivuriza ku kigo nderabuzima cya Kinigi kiri mu karere ka Musanze, baravuga ko kuva cyavugururwa kikongerwamo serivise zirimo n'ubuvuzi bw’indwara zo mu kanwa byabaruhuye ingendo ndende bakoraga bajya ku bitaro bikuru bya Ruhengeri.

Mu 1954 nibwo hubatswe ikigo nderabuzima cya Kinigi giherereye hafi ya santire y'ubucuruzi ya Kinigi.

Kuva muri uwo mwaka ntikigeze cyongererwa ubushobozi  yaba mu nyubako no mu bikoresho, abahivurizaga mbere y'uko kivugururwa bavuga ko amazi ava mu birunga yakigeragamo bigatuma badahabwa serivisi nziza.

Muri uyu mwaka ubwo hubakwaga umudugudu w’icyitegererezo wa Kinigi byagendanye no kuvugurura iki kigo nderabuzima, gishyirwa ku rwego rwisumbuye kuko cyongerewe ubushobozi .

Muri iki gihe, abatuye mu muri uyu mudugudu wa Kinigi no mu Mirenge bihana imbibi bashima ko bavurirwa ahantu heza hisanzuye.

Umuyobozi w’ikigo nderabuzima cya Kinigi, Mukasine Clemence avuga ko ubu umubare w'abo bakira wiyongereye aho nibura ku munsi abahivuriza baba bari hagati 100 -150.

Iki kigo nderabuzima cya Kinigi cyahawe ubushobozi bwo kwakira abarwayi bivuza badataha bagera kuri 24 n’ibitanda 10 byashyizwe mu nzu y’ababyeyi, hongerewemo serivisi eshatu, ubuvuzi bw’indwara zo mu kanwa, gupima ababyeyi batwite hifashishijwe “Ecographie” ndeste n’ubuvuzi bw’amaso.

Yaba abatujwe mu mudugudu w’icyitegererezo wa Kinigi ndetse n’abaturuka impande zitandukanye, bashimira umukuru w’igihugu bakamwizeza ko bazasigasira ibi bikorwaremezo ndetse ko batazongera kurembera mu ngo.

Dr Muhire Philbert, Umuyobozi mukuru w’ibitaro by’icyitegererezo bya Ruhengeri ashimangira ko abo mu gice bakunda kwita ku ishyamba bakoraga ingendo ndende baje gushaka serivisi ku bitaro bikuru ubu bagabanutse, kandi ko serivisi y’ubuvuzi bw’amaso itaratangira gukora iri hafi kubonerwa umuganga.

Iri vuriro riri mu bikorwaremezo bigize umudugudu w’icyitegererezo wa Kinigi, watujwemo imiryango 144 muri uyu mwaka.

Ally Muhirwa