Abatuye muri Gisagara basabye ko umuhanda Kansi Kigembe Nyanza wakorwa kuburyo burambye

Abaturage bakoresha umuhanda Kansi-Kigembe- Nyanza uherereye mu karere ka Gisagara, barasaba ko uyu muhanda wakorwa ku buryo burambye, ni nyuma y'aho uyu muhanda wangiritse ku buryo bukomeye ibintu bibangamiye ubuhahirane n’ibindi bikorwa by’iterambere.

Ni umuhanda urimo imikuku, ibinogo birimo amazi ndetse n'imiferege iyobora amazi yarangiritse, ku buryo iyo imvura iguye amazi yose yireka mu muhanda akawangiza.

Bamwe mu baturage bakoresha uyu muhanda uhuza Imirenge ya Kansi-Kigembe na Nyanza yo mu karare ka Gisagara baravuga ko kuba uyu muhanda warangiritse ubangamira ubuhahirane.

Aba baturage basaba ko uyu muhanda uhuza iyi Mirenge itatu yo muri Gisagara wakorwa kandi mu buryo burambye.

Umuyobozi w’Akarere ka Gisagara wungirije iterambere ry’ubukungu, Habimana Jean Paul avuga ko  mu gutegura ingengo y'imari y'umwaka utaha hazazirikanywa no ku ikorwa ry’uyu muhanda. 

Umuhanda Kansi -Kigembe -Nyanza ufite kilometero 10, ni umuhanda wa laterite waherukaga gukorwa mu myaka 4 ishize.

Manzi Claude