Abatuye i Rusizi bavuze ko babangamiwe n’ibura ry’imiti isukura amazi ya Sur'Eau

Abaturage batuye mu bice bitandukanye by'akarere ka Rusizi, baravuga ko imiti isukura amazi izwi nka sur' eau batakiyibona aho bayiguriraga, mu gihe hari igice kinini cy'aka karere kigikoresha amazi yo mu migezi cyane cyane muri ibi bihe by'impeshyi, bakaba bafite impungenge zo kuba bakwandura indwara zikomoka ku ikoreshwa ry’amazi mabi.

Iyo winjiye muri pharmacy cyangwa mu ivuriro no mu maduka yo mu mugi wa Rusizi cyangwa yo mu byaro by'aka karere, ukabaza umuti usukura amazi uzwi nka sur’eau igisubizo uhabwa ni uko iyo miti yabuze ndetse batanayiheruka.

Aba baturage RBA yasanze mu kibaya cya Bugarama bavuze ko iyi miti yari ibafitiye akamaro gakomeye, kuko bayikoreshaga mu gusukura amazi.

Iri bura ry'iyi miti isukura amazi banarihurizaho n'abakora mu nzego z'ubuzima, nabo bavuga ko yabuze mu gihe gishize.

Umuyobozi muri minisiteri y’ubuzima ushinzwe imikoranire n’itangazamakuru Julien Mahoro Niyingabira, avuga ko iki kibazo cyatewe no kuba uruganda rwo mu gihugu cya Kenya baguragaho iyi miti rwarahagaze, kubera icyorezo cya covid19.

Gusa anagira inama abaturage ko sur’eau idakoreshwa mu gusukura amazi atemba, ahubwo akabasaba kuyasukura bayateka.

Gukoresha amazi meza ni imwe mu ngamba zo kurwanya indwara zikomoka ku mwanda cyane cyane usanga zikunda kwibasira abana, by’umwihariko ariko ni n’imwe mu ngamba zifashishwa muri ibi bihe byo kwirinda icyorezo cya covid19 cyugarije isi by’umwahariko aho basabwa gukaraba kenshi.

Gatete Eric Rafiki