Abashyingura abishwe na Covid19 bavuze ko muri iyi minsi abo bashyingura ari benshi

Mu gihe imibare y'abicwa na COVID-19 ikomeje kuzamuka, bamwe mu bakozi ndetse n'abaturiye amarimbi yakira n'abashyingura ababo bazize iki cyorezo bemeza ko izamuka ry'imibare y'abarimo guhitanwa nacyo ugaragarira buri wese, bagereranyi n'iyo bari bamenyereye.

Bamwe mu baturiye irimbi rya Rusororo riri mu karere ka Gasabo ndetse n'irimbi ry'i Nyamirambo mu karere ka Nyarugenge ndetse n'abafasha muri serivisi zo gushyingura, bose bemeza ko ari kenshi  basigaye babona abishwe na coronavirus baje gushyingurwa kurenza mu bihe byashize.

Ibi barabivuga mu gihe ku wa Gatandatu w'iki Cyumweru, abantu 17 bahitanywe na COVID-19, bituma umubare w'abishwe nayo mu Rwanda ugera kuri 551.

Ni nyuma y'uko ku munsi hagenda hapfa abantu kuva ku 10 no kuzamuka bahitanywe na covid19.

Umukozi ushinzwe imirimo ya buri munsi yo gushyingura mu irimbi rya Rusororo, Nkusi Anselme avuga ko imibare y'abahashyingurwaga mbere bishwe na coronavirus ntaho ihuriye n'iyo muri iyi minsi.

Udahemuka Magnus ukora  mu itsinda rishinzwe gukurikirana abarwayi ba Covid 19 by’umwihariko mu birebana n’ubuzima bwo mu mutwe, avuga ko abantu bagomba kwitwararika iki cyorezo bitewe n’uko gihitana ubuzima bw'abantu ndetse kikanahungabanya umuryango wose.

Guhera ku tariki ya 01 Nyakanga uyu mwaka, umubare w'abahitanwa n'icyorezo cya COVID-19 nturajya munsi y'abantu 10, ahubwo ugenda usatira abantu 20 ku munsi.

Ibi binajyana n'ubwiyongere bw'abandura bashya basigaye bari hejuru ya 800 ku munsi n'abarwayi barembye kuri ubu bari hajuru ya 60. Abaturarwanda bakaba basabwa gukomeza kubahiriza amabwiriza yo kwirinda iki cyorezo yose uko yakabaye kugira ngo iyi mibare ibe yagabanuka.

Bosco Kwizera