Abapolisi b’u Rwanda 176 berekeje muri Sudani y’Epfo mu butumwa bw’amahoro

Mu gitondo cyo kuri uyu wa Gatanu, Abapolisi b’u Rwanda 176 berekeje muri Sudani y’Epfo mu butumwa bw’amahoro.

Aba bapolisi 176 bagizwe na 20% b’abagore, bari bamaze iminsi bari mu kigo cy’amahugurwa cya Polisi giherereye mu Karere ka Rwamagana mu Murenge wa Gishari.

Umuyobozi Mukuru wa Polisi y’Igihugu, Dan Munyuza, mbere yo guhaguruka, yabasabye guhesha agaciro u Rwanda aho bazaba bari mu mahanga.

Yabibukije ko mbere yo guhagararira Polisi y’u Rwanda bagiye guhagararira u Rwanda n’abanyarwanda muri rusange, abasaba kutazasuzuguza izina ry’umunyarwanda mu mahanga.

Aba bapolisi bagiye bayobowe na CSP Carlos Kabayiza.

Abo basimbuye 160 bari bamazeyo amezi asaga 18 nabo bageze i Kigali mu masaha ya mbere ya saa sita kuri uyu wa Gatanu.