Abanyarwanda hirya no hino mu mahanga bizihije isabukuru yo kwibohora

Abanyarwanda baba mu mahanga barishimira isabukuru y'imyaka 25 u Rwanda rumaze rwibohoye, ibi bigashimangirwa n'amahoro n'umutekano bituma iterambere ry'Igihugu ryihuta.

Muri Kenya, Abanyarwanda bifatanyije n'abayobozi b'iki gihugu n'inshuti z'u Rwanda, mu kwizihiza ku nshuro ya 25 u Rwanda rwibohoye.

Ni ibirori byaranzwe n'amasengesho bashimira kuba bafite igihugu bita icyabo.

Abanyarwanda kandi banataramye mu mbyino zigaragaza umuco nyarwanda, imikino no kugaragaza intambwe u Rwanda rumaze gutera mu iterambere ry'ubukungu no mu bumwe n'ubwiyunge.

Ambasaderi Richard Masozera uhagarariye u Rwanda muri Kenya, yabwiye abitabiriye ibi birori ko kuba ingabo za RPA, zari ziyobowe na perezida wa repubulika Paul Kagame zarabohoye u Rwanda kandi zigahagarika jenoside, byafashije u Rwanda kongera kwiyubaka nyuma y'igihe kinini cy'ubuyobozi bubi.

Yagize ati “ Yego, u Rwanda rwageze ahabi! Ariko dushima cyane ubuyobozi bwiza bwa Perezida Kagame, wari umugaba mukuru w'ingabo za RPA zahagaritse jenoside, kandi bakagarura umutekano n'amahoro mu Rwanda. Rero iyo tuvuze imyaka 25, tuba tuvuga imyaka 25 y'iterambere, imyaka 25 tubayeho nyabyo. Ibyo u Rwanda rwagezeho, bishingiye ku kuba gahunda zose z'iterambere zishingiye ku muturage.”

Zambiya

Muri Zambiya, abanyarwanda baba muri icyo gihugu bagera kuri 500 bifatanyije n'inshuti zabo nabo kwizihiza umunsi mukuru wo kwibohora.

Ambasaderi Mukaruriza Monique uhagarariye u Rwanda muri Zambiya, yashimye ubutwari no gukunda igihugu byaranze ingabo zabohoye u Rwanda, mu gihe rwari rumaze igihe ari igihugu kirangwamo ivangura, amacakuri, ruswa n'umuco wo kudahana.

Avuga ko kuba ingabo za RPA zarahagurutse muri 1990 ngo zihagarike iyo miyoborere mibi, ari ubutwari buri munyarwanda akwiye guharanira kugira kuko ari byo byafashije u Rwanda gutera intambwe ishimishije mu iterambere.

U Bubiligi

Abanyarwanda baba mu Bubiligi nabo ntibasigaye mu kkwiizihiza uyu munsi ukomeye mu mateka y'u Rwanda. Abana bato nibo baserutse mu mbyino zigaragaza ko bazirikana igihugu cyabo kandi bagaharanira gusigasira umuco.

Uhagarariye u Rwanda muri icyo gihugu, Ambasaderi Rugira Amandin yibukije Abanyarwanda n'abanyamahanga bitabiriye ibi birori, ko ku ya 4 nyakanga muri 1994, ari bwo abari ingabo za RPA zazengurukaga umujyi wa Kigali. Ashimangira ko cyari ikimenyetso cy'insinzi, ariko n'umukoro wa gombaga gukurikiraho wo kongera gusana igihugu cyasaga n'icyazimye.

Avuga ko umurava bari bafite, no kureba kure k'umukuru w'igihugu Paul Kagame ari byo bigejeje u Rwanda aho ruri ubu, rukaba ari urugero rwiza ku bindi bihugu by'afurika, kuko rugaragaza ko kubanza kwita ku bitekerezo by'abaturage, ugaharanira gukemura ibibazo bafite, ari ibintu bishoboka.

U Burusiya

Abanyarwanda baba mu Burusiya nabo bahuriye hamwe, bongera kwishimira umunshi mukuru wo guhagarika jenoside no kubohora igihugu.

Mu mbyino ziinyuranye ziganjemo iz'umuco nyarwanda, Abanyarwanda bishimiye kuba Igihugu cyaravuye mu icuraburindi, ubu bakaba baterwa isheme no kuba bakomoka i Rwanda, kandi bafie ibyo barata ku Gihugu cyabo.

Jeannette UWABABYEYI