Prezida Obama yifatanyije n’abanyarwanda kwibuka ku nshuro ya 20 Genocide yakorewe abatutsi

Perezida wa Leta zunze ubumwe za Amerika Barack Obama atangaza ko yifatanyije n’Abanyarwanda mu gikorwa cyo kwibuka ku nshuro ya 20 jenoside yakorewe abatutsi mu Rwanda. Mu itangazo ryashyizwe ahagaragara n’ibiro by’umukuru wa Leta zunze ubumwe za Amerika, Perezida Obama yagize ati twifatanyije n’Abanyarwanda muri ibi bihe hibukwa ku nshuro ya 20 jenoside yakorewe abatutsi ikaba yaratwaye imbaga isaga Miliyoni y’inzirakarengane, barimo abagore,abana,abagabo,abakecuru ndetse n’abasaza. Muri iri tangazo, Perezida Barack Obama yavuze ko bifatanyije n’imiryango yabuze ababo muri jenoside yakorewe abatutsi, kandi bakaba bashima ubutwari abayirokotse bakomeje kugaragaza baharanira kwiteza imbere bakarenga agahinda batewe no kubura ababo. Yashimye uburyo u Rwanda rukataje mu nzira yo guteza imbere ubukungu ndetse n’imibereho myiza y’abarutuye. Ati jenoside yakorewe abatutsi mu Rwanda ntiyari impanuka,yarateguwe ishyirwa mu bikorwa n’ubutegetsi bubi bwariho mu gihe yabaga. Perezida Obama yakomeje avuga ko buri wese asabwa gutanga umusanzu we mu kurwanya no gukumira ko hari ahandi ku isi jenoside yakongera kuba. Umukuru wa Leta zunze ubumwe za Amerika avuga kandi ko kuba Abanyarwanda bibuka ku nshuro ya 20 jenoside yakorewe abatutsi ari umwanya mwiza ku isi wo gusubiza amaso inyuma bakamenya ko guha agaciro ubuzima bwa muntu ari ingenzi, barwanya ishyari ndetse no kutarangwa no kudatabara uri mu kaga nk’uko byagenze mu Rwanda mu gihe cya jenoside,aho amahanga yarebereye ubwicanyi bwakorerwaga imbaga y’inzirakarengane.