Ubumwe n’ubwiyunge niwo musemburo w’iterambere-PM Murekezi

Minisitiri w'intebe Anastase Murekezi aravuga ko ubumwe n’ubwiyunge bugomba gukomeza kuba umusemburo w’iterambere rirambye kandi ryihuse, u Rwanda rwiyemeje kugeraho. Ibi amaze kubivugira mu Karere ka Nyaruguru mu gutangiza Ihuriro ry'Ubumwe n'ubwiyunge muri ako Karere.

Minisitiri w'intebe yasobanuye ko iki gikorwa gishingiye ku bikorwa perezida wa Repubulika Paul Kagame yahize byo gushyigikira imiyoborere igamije kwimakaza ubumwe n’ubunyarwanda.

Unity Club ni ihuriro ry’abahoze n’abakiri muri guverinoma,n’abo bashakanye. Iri huriro ry'ubumwe n'ubwiyunge rizakora ku rwego rw’Akarere n’Umurenge. Ubu rimaze gutangizwa mu Turere twose tw’u Rwanda. Ministre w'intebe yavuze ko guhuza abahoze muri Guverinoma y'u Rwanda, abayirimo n’abo bashakanye, bimaze gutanga umusaruro ushimishije cyane.

Iri huriro rizafasha Abayobozi b’ubu n’abo basimbuye gushyira hamwe mu gusigasira no kongera ibyiza u Rwanda rumaze kugeraho. Gushyigikira Gahunda ya Ndi Umunyarwanda, imwe mu nkingi ya mwamba ibikorwa by’Ihuriro ry’Ubumwe n’Ubwiyunge bizashingiraho.

Yavuze ko ari ngombwa gukomeza kwimika ubumwe bw'abanyarwanda nk’uko Abarinzi b'Igihango n’Abanyarwanda bose muri rusange  babyemereye perezida Paul Kagame.