Perezida Kagame yagiranye ibiganiro byihariye na mugenzi we wa Benin

Ku munsi wa Kabiri w'uruzinduko rwe mu Rwanda, Perezida wa Benin Patrice Talon yagiranye ibiganiro byihariye na mugenzi w'u Rwanda Paul Kagame, ibiganiro byabereye muri Village Urugwiro.

Nyuma y'ibi biganiro byahuje aba banyacyubahiro bombi hakurikiyeho inama yitabiriwe n'abayobozi bo ku rwego rwo hejuru muri guverinoma z'ibihugu byombi.

Perezida wa Benin Patrice Talon yageze mu Rwanda ku wa mbere.

Akigera ku kibuga cy'indege mpuzamhanga cya Kigali yakiriwe  na mugenzi we w'u Rwanda Paul Kagame waje no kumwakira ku meza ku mugoroba.

Akigera mu Rwanda kandi perezida wa Benin yunamiye inzirakarengane zazize Jenoside yakorewe Abatutsi mu Rwanda ku rwibutso rwa Jenoside rwa Kigali ruri ku Gisozi.

Uretse kwakirwa mu biro by'úmukuru w'igihugu cy'u Rwanda, Perezida wa Benin  yanasuye Ikigo cy'igihugu cy'iterambere RDB aho yavuye ajya gusura agace kihariye kahariwe inganda muri Kigali.