Perezida Nyusi yasuye inzego z'umutekano z'u Rwanda na Mozambique

Perezida wa Mozambique Filipe Jacinto Nyusi arashimira ingabo z’ u Rwanda kubera akazi keza zikomeje gukora mu rugamba rwo kurwanya iterabwoba mu ntara ya Cabo Delado muri Mozambique.

Ibi perezida Nyusi yabibwiye ingabo z’ u Rwanda n’ iza Mozambique yasuye ku munsi w’ ejo.

Akigera mu duce twa Palma na Afungi mu Ntara ya Cabo Delgado Perezida Nyusi yakiriwe n’ abayobozi b’ingabo z’ u Rwanda n’ iza Mozambique muri iyo ntara agirana ibiganiro n’ ingabo n’ abapolisi bari mu rugamba rwo kurwanya iterabwoba mu ntara ya Cabo Delgado.

Perezida Nyusi yashimye ubutwari izi ngabo zikomeje kugaragaza anazisaba gukomeza umuhate muri uru rugamba.

Umukuru w’ igihugu cya Mozambique yashimye kandi ubufatanye n’imikoranire myiza bikomeje kuranga ingabo z’ u Rwanda n’ iza Mozambique kuva hatangijwe urugamba rwo guhashya imitwe y’ iterabwoba yari yarayogoje intara ya Cabo Delgado muri Mozamabique.

Perezida Filipe Nyusi yasabye izi ngabo gukomeza uyu mutima w’ubufatanye kugira ngo ibyihebe bizatsindwe burundu muri Mozambique.

Sylivanus KAREMERA