Ni ibiki byafasha umuyobozi gukora neza mu nzego z’ibanze?

Umuyobozi w'Ishyirahamwe rihuza inzego z'ibanze n'Umujyi wa Kigali (RALGA), Ngendahimana Ladislas, yavuze ko kumenya icyerekezo cy’igihugu no kwimenya nk’umuntu ari byo bishobora gufasha umuyobozi mu nzego z’ibanze kugera ku nshingano.

Yabigarutseho mu Kiganiro Waramutse Rwanda cyo kuri uyu wa Gatatu, cyagarutse by’umwihariko ku mikorere n’imikoranire y’inzego z’ibanze zegerejwe abaturage.

Ngendahimana yavuze ko mu nzego z’ibanze haba uburyo buhoraho bwo kubaka ubushobozi ku bari muri izo nzego ariko hakabaho no kugisha inama yaba hagati y’abakorana cyangwa abandi bari mu zindi nzego.

Ati “Ubundi kugira ngo ubashe gukora neza mu nzego z’ibanze uko nabibonye, icya mbere ni ukubanza kumenya icyerekezo cy’igihugu, na we ukimenya noneho ukibaza ukuntu wose uza kwihuza n’icyerekezo cy’igihugu.”

Avuga ko aho ariho haza amategeko, politiki n’uburyo umuyobozi cyangwa umuntu wese abazwa inshingano z’ibyo akora cyangwa ibyo yagombaga gukora ariko akaba atabikoze.