Minisitiri w’Intebe yafunguye ibiro by’ikigega FEDA

Minisitiri w'Intebe Dr Edouard Ngirente kuri uyu wa Gatatu yafunguye ku mugaragaro ibiro by'Ikigega Nyafurika kigamije Iterambere ry’Ubucuruzi bwohereza ibintu mu Mahanga (Fund for Export Development in Africa). 

Biteganyijwe ko ku ikubitiro iki kigega gifite ibiro i Kigali, kizakorana bya hafi n’abo mu nzego zitandukanye zirimo n'iz'abikorera.

Iki kigega cyitezweho kuzamura ihangwa ry’imirimo no koroshya ishyirwa mu bikorwa ry’amasezerano y’isoko rusange rya Afurika agamije koroshya urujya n’uruza rw’abantu, ibicuruzwa na serivisi.

Mu bindi iki kigega cyitezweho ni ukorohereza abakora mu rwego rw'abikorera bo muri Afurika kubona inguzanyo zibafasha mu mishinga yabo igamije ahanini guteza imbere urwego rwa serivisi ndetse no kohereza hanze ibicuruzwa biturutse kuri uyu mugabane.