Minisitiri Gatabazi yasabye ko isoko nyambukiranyamipaka rya Rugali rigaragaza ibikorerwa mu Rwanda

Mu ruzinduko arimo  kugirira mu Karere ka Nyamasheke, Minisitiri w'Ubutegetsi bw'Igihugu, Gatabazi Jean Marie Vianney yasabye ko habaho ubufatanye bwisumbuyeho mu gukora ibishoboka byose isoko nyambukiranyamipaka rya Rugali, rikaba isoko rigaragaza neza ibikorerwa mu Rwanda n'ibihahingwa.

Ni isoko ryubatse ku cyambu cya Rugali cyo ku kiyaga cya Kivu, rikaba rikunze guhahirwamo n'abaturage benshi bo muri Repubulika Iharanira Demokarasi ya Congo.

Minisitiri Gatabazi yavuze ko ibi byagerwaho hashyirwa ibyuma bisya imyaka itandukanye, aho gushyira ibicuruzwa n'amatungo bitagurishijwe n'ibindi.

Yasabye ko kandi Akarere ka Nyamasheke n'Intara y'Uburengerazuba ko bakorana n'abikorera, iri soko rikazanwamo umusaruro ukunze kubura isoko hirya no hino mu gihugu kuko abakiliya bawukeneye ngo bahari.

Iri soko kuva ryatangira gukorerwamo mu mezi asaga atandatu ashize, imisoro akarere kinjiza yavuye kuri miliyoni 8 z’amafaranga y’u Rwanda ku kwezi, igera kuri miliyoni 14 z'amafaranga y'u Rwanda.