EMIR WA QATAR YASHOJE URUZINDUKO YAGIRIRAGA MU RWANDA

Umukuru w’igihugu cya Qatar Sheikh Tamim Bin Hamad Al Thani yashoje uruzinduko yagiriraga mu Rwanda, kuri uyu wa Kabiri tariki 23 Mata 2019, aho aho yaherekejwe ku kibuga cy’indege mpuza mahanga cya Kigali na Minisitiri w’intebe w’u Rwanda Edouard Ngirente.

Emir wa Qatar ari kumwe na Perezida wa Repubulika Paul Kagame, kuri uyu wa Mbere tariki 22 Mata 2019, basuye Parike y’igihugu y’Akagera iri mu burasirazuba bw’u Rwanda.

Muri uru ruzinduko rwe mu Rwanda, uyu muyobozi mukuru wa Qatar yashimiye Perezida wa Republika Paul Kagame uburyo yamwakiriye mu Rwanda kandi yizeza ko uruzinduko rwe mu Rwanda ruzagira inyungu ku mpande zombi.

Ni uruzinduko rusize impande zombi zashyize umukono ku masezerano y’imikoranire mu bijyanye n’ubwikorezi bwo mu kirere, guteza imbere ishoramari no kurirengera, ubufatanye mu bya tekiniki mu rwego rw’ubukungu n’ubucuruzi, ndetse n’ubufatanye mu mushinga wa Gabiro Agro-processing hub.

Ubusanzwe ibihugu byombi bisanganywe ubufatanye mu nzego z’ubucuruzi, ishoramari, ikoranabuhanga n’itumanaho, ibikorwa remezo, ubukerarugendo n’izindi.