RBC iributsa abantu kutirara muri iki gihe gukingira COVID19 birimbanyije

Ikigo cy'igihugu gishinzwe ubuzima cyavuze ko gutanga vuba urukingo rwa Covid 19 rugahabwa abantu benshi bafite ibyago byinshi byo kwandura ndetse bamwe bakaba bazahazwa nacyo, aribyo bizatuma urukingo rugira akamaro mu minsi iri imbere.

Abacuruzi bo  mw'isoko rya Gahanga mu Karere ka Kicukiro ndetse no kuri centre y'ubucuruzi ya Gahanga bagera ku 1200 kuri uyu wa mbere bahawe urukingo rwa Covid 19. Bavuga ko ari ingenzi cyane mu kurengera ubuzima bwabo.

Umuyobozi Mukuru w'ikigo cy'igihugu gishinzwe ubuzima RBC, Dr. Sabin Nsanzimana  avuga ko inkingo za Covid 19 zatangiye gutangwa mu Rwanda zitagomba kuba intandaro yo kuba abantu bakwirara.

Yagize ati « Abantu bashobora gutekereza ko ubwo urukingo rwaje, covid yarangiye, ntabwo ari byo, ahubwo iyo utarebye neza urukingo rushobora kuba ikibazo cy'uko abantu bakwirara, hanyuma covid ikongera ikazamuka. Urukingo rwa Covid rwaje ruje gusubiza ibibazo 2, kugabanya abapfa bishwe na covid no kugabanya abantu barwara bakaremba kubera covid 19. Inkingo dufite aha mu Rwanda uko ari 2 zibasha gusubiza icyo kibazo 100%, kuko umuntu wakingiwe ashobora kwandura covid ariko ntarembe cyangwa se ngo imuhitane. Kugeza ku gipimo cya 100% ziriya nkingo zombi zirabyujuje, ariko ntago urukingo rubuza umuntu kuba yakwandura covid 100%, ushobora kwandura covid nturembe ariko ukaba wayanduza undi udakingiye kandi wowe ukingiye. »

Dr. Nsanzimana anavuga ko gutanga urukingo kuri benshi kandi mu gihe gito, aribyo bizatanga umusaruro mu guhashya Covid19.

Ati « Uko utanga urukingo vuba wihuta, ukaruha abantu benshi bashobora guhitanwa cyangwa kurembywa na Covid19, ni bwo buryo bwiza urukingo rwazagira akamaro mu minsi iri imbere. Hari urukingo ruri gukoreshwa cyane rwa Astrazneca, mbwira abantu ko ari urukingo rwizewe, ni n'urukingo tuzabonamo inkingo nyinshi, hari umubare munini w'izindi dutegereje, niy o mpamvu twifuje ko dutanga uru rwa mbere, zose zikarangira tutagize urwo tubika. Ntabwo ruzatangwa mu gihe cyegeranye cyane kuko ubushakashatsi bushya bugaragaza ko iyo urutanze mu byumweru byibura 8 hagati y'urwa 1 n'urwa 2, ni bwo ruzamura ubudahangarwa kurenga 80%. Urukingo rutangira kugira akamaro iyo umaze ibyumweru 2 ufashe dose ya 2, wamara gufata iyo ya 2 ugategereza ibyumweru 2 kugira ngo umubiri ukore ubudahangarwa bwo kwirwanaho. »

Abakora mu bijyanye n'inkingo mu Rwanda  bavuga ko ku bwoko bw'inkingo 2 u Rwandda rukoresha kugeza ubu, agacupa kamwe k'urukingo rwo mu bwoko bwa Pfizer kaba karimo dose 6 mu gihe urwo mu bwoko bwa Astrazneca kaba karimo dose 10.

Imibare itangwa na Ministeri y'Ubuzima igaragaza ko abamaze gukingirwa bose hamwe kuva iki gikorwa cyatangira kw'itariki ya 5 z'uku kwezi ari abantu basaga ibihumbi 257.

Minisiteri y'Ubuzima ivuga ko hari izindi nkingo za Covid 19 zizagera mu gihugu mu gihe cya vuba. Intego n'uko bitarenze mu kwezi kwa Gatandatu k'umwaka utaha wa 2022, u Rwanda ruzaba rwamaze gukingira 60% by'abaturage bose, bangana n'abantu miliyoni 7 n'ibihumbi 800.

Carine Umutoni