Minisitiri ushinzwe ubuhinzi n’iterambere ry’icyaro muri Santarafrika Mathieu yasuye umushinga wo kuhira imyaka i Nasho

Kuri uyu wa Kabiri, Minisitiri ushinzwe ubuhinzi n’iterambere ry’icyaro muri Santarafrika  Mathieu Éric Rokosse-Kamot aherekejwe n’Umunyamabanga wa Leta muri Minisiteri y’ubuhinzi n’ubworozi mu Rwanda, Dr Ngabitsinze Jean Crysostome, basuye umushinga mugari wo kuhira imyaka hakoreshejwe ingufu zikomoka ku mirasire y’izuba uherereye i Nasho mu karere ka Kirehe.

Uyu mushinga wo kuhira imyaka wa Nasho, ufite ikoranabuhanga rituma huhirwa imyaka iri kuri hegitari 1173.

Ufasha abahinzi 2099 bakora ubuhinzi busanzwe ku buso butoya ukagira n’ingufu zikomoka ku mirasire y’izuba zitanga megawatt 3.3, ari zo zikoresha imashini zifashishwa mu kuhira na megawatt 2.4 zibikwa muri za batiri.

Minisitiri Mathieu Éric Rokosse-Kamot yagaragaje ko uyu mushinga wo kuhira hakoreshejwe iri koranabuhanga, ari ikintu ibihugu by’u Rwanda na Centrafrika byagiramo ubufatanye mu rwego rwo kureshya abashoramari, no gushyigikira abahinzi basanzwe kugira ngo bongere umusaruro w’ubuhinzi.