Ubwishingizi bw'Amafi mu bigiye kwitabwaho guhera mu 2023

Minisiteri y'Ubuhinzi n'Ubworozi ivuga ko gushyira amafi mu bwishingizi, ari kimwe mu bizatuma ubworozi bwayo burushaho gushorwamo imari no kubyaza umusaruro ibiyaga biri mu gihugu. Aborozi b'amafi mu Rwanda bashimangira ko bari batewe impungenge n'uko amafi atishingirwaga nyamara ubworozi bwayo bukomeje gutanga umusaruro ufatika.

Amafi, bumwe mu bworozi bukomeje gushorwamo imari na benshi hirya no hino mu gihugu uhereye ku magi atanga abana b'amafi kugeza ku mafi yororwa akajyanywa ku masoko.

Umusaruro w'amafi  mu mwaka wa 2021/2022 ungana na miliyoni 43.560 za toni.

Gusa abari muri ubu bworozi bagaragaza ko usibye kuba ibiryo byayo bihenze ngo haniyongeraho n'uko atarashyirwa mu bwishingizi nyamara ubworozi bwayo bukunze guhura n'ibibazo byinshi.

Guhera mu uru ku kwezi kwa Mbere 2023, amafi nayo yemerewe gushyirwa mu bwishingizi.

Umuyobozi mukuru muri minisiteri y'ubuhinzi n'ubworozi ushinzwe uruhererekane nyongeragaciro, Octave Nshimiyimana avuga ko kongera umubare w'ibihingwa n'amatungo byishingirwa harimo n'amafi bizongera abashoramari mu buhinzi n'ubworozi.

Ibigo 5 nibyo bisanzwe bitanga service z'ubwishingizi bw'ibihingwa n'amatungo, muri ibi bigo akaba ari ho leta inyuza nkunganire igenerwa abaturage kugirango bizorohe igihe bizaba ngombwa ko umuhinzi cyangwa umworozi agobokwa.

Bamwe mu bahagarariye ibi bigo by'ubwishingizi basobanura ko biteguye gukomeza kwakira abahinzi n'aborozi bashya muri iyi  gahunda.

Kuva muri Mata 2019 ubwo hatangiranga gahunda ya ''tekana urishingiwe muhinzi-mworozi'', abamaze kugerwaho n'iyi gahunda bagera ku bihumbi 513, aho leta imaze gutanga nkunganire ya miliyari 1 na miliyoni 700, naho miliyari 4 na miliyoni 246 zatanzwe muri gahunda yo kugoboka abahuye n'ibibazo.

Minagri isaba ibigo by'ubwishingizi kunoza service kugirango abagobokwa bahabwe amafranga yabo ku gihe.

Jean Claude Mutuyeyezu